विराटनगर — देशको ‘औद्योगिक राजधानी’ विराटनगर वर्षको चार दिन एउटा धार्मिक राजधानीमा रूपान्तरण हुन्छ । जब सहरभर ‘छठ मइया’का गीत गुञ्जिन्छन्, नदीदेखि नहरसम्म दीप प्रज्वलित हुन्छन् । महिलाहरू निराहार बसी सूर्यलाई अर्घ्य दिन घाटतर्फ निस्कन्छन् ।‘छठ पर्व होइन, यो आस्था, सहनशीलता र श्रमको उत्सव हो’, सिंघिया खोलामा भेटिएका स्थानीय रघुपतिलाल यादवले सुनाए, ‘अस्ताउँदो सूर्यको आराधना र उदाउँदो सूर्यलाई अर्घ्य दिएर प्रकृतिप्रति कृतज्ञता व्यक्त गर्ने यो परम्परा विराटनगरमा वर्षौंदेखि संस्कारको रूपमा जरा गाडिसकेको छ ।’ छठका चार दिनमा विराटनगरका मुख्य घाटहरू– सिंघिया, केशलिया, मिलनचोक, त्रिमूर्ति तथा नहर र पोखरीहरू आस्थाको केन्द्र बन्छन् । साँझ पर्दै गर्दा ती घाटहरू दीप र रंगोलीले झकिझकाउ छन् ।सहरका युवाहरू स्वयंसेवकका रूपमा जुटेका छन् । प्रहरी, स्काउट र छठ समितिका सदस्यहरू सुरक्षा र सरसफाइमा खटिन्छन् । महिलाहरूले माटाको गाग्रीमा धूप, दीप र फलफूल सजाउँछन् ।सिंघिया खोलाको किनार सोमबार साँझमा रंगीन बनेको छ । हजारौं दीपको उज्यालोसँगै पानीमा परावर्तित दृश्य निकै रोमाञ्चक देखिएको छ । ‘यसैले विराटनगरका बासिन्दालाई आस्था र सौन्दर्यको मिलन अनुभूति गराउँछ’, स्थानीय रामवती राजवंशीले सुनाइन् ।

निराहार शरीर, अटल मन