कोशी प्रदेशका स्वास्थ्यमन्त्री मानवहादुर लिम्बुले भोजपुर जिल्ला अस्पताल, भोजपुर जिल्ला आयुर्वेद अस्पताल र जिल्ला स्वास्थ्य कार्यालयहरूको अनुगमन तथा निरीक्षण गरेका छन्। निरीक्षणका क्रममा उनले स्वास्थ्यकर्मी र प्रशासनसँग छलफल गर्दै सेवा प्रवाहलाई बिरामीमैत्री, सहज र प्रभावकारी बनाउन निर्देशन दिएका छन्।
मन्त्री लिम्बुले न्यूनतम सेवा मापदण्डलाई व्यवहारमै लागू गर्न, औषधि र उपकरणको व्यवस्थापन मिलाउन, आपतकालीन सेवा सुदृढ बनाउन र उपलब्ध जनशक्तिको समुचित उपयोग गर्न जोड दिए। उनले राम्रो व्यवहार, संवेदनशीलता र प्रविधिको सरल प्रयोगबाट सेवा छिटो र पारदर्शी बनाउन सकिने उल्लेख गरे।
यसअघि उनले सोलुखुम्बु जिल्ला, ओखलढुंगा जिल्ला, खोटाङ जिल्ला, भोजपुर जिल्ला र सङ्खुवासभा जिल्लाका स्वास्थ्य निकायहरूमा समेत अनुगमन गरिसकेको जानकारी दिँदै सहकार्य र समन्वयबाट गुणस्तरीय स्वास्थ्य सेवा सुनिश्चित गर्न सकिने बताएका छन्।