विराटनगरका तारे होटलभित्र सञ्चालन हुँदै आएका क्यासिनो पटकपटक विवादमा मुछिने गरेका छन् । विदेशी पर्यटक भित्र्याउने उद्देश्यले सञ्चालन अनुमति पाएका क्यासिनोहरूले धमाधम नेपाली नागरिकलाई नै खुला रूपमा प्रवेश गराएर जुवा खेलाउने गरेपछि यहाँका होटलहरू विवादमा तानिने गरेका हुन् ।

गत २०८२ पुस महिनामा जिल्ला प्रशासन कार्यालय मोरङ र मोरङ प्रहरीले संयुक्त रूपमा छापा मार्दै विराटनगरका विभिन्न तारे होटलमा सञ्चालित क्यासिनोबाट नेपाली खेलाडी पक्राउ गरी कारबाही गरेको थियो । त्यसयता क्यासिनोहरूमा नेपाली प्रवेशमा केही समय कडाइ देखिए पनि पछिल्लो समय फेरि पुरानै शैलीमा नेपाली व्यवसायी र युवालाई क्यासिनो खेलाउन थालिएको छ । गत पुसमा मोरङका प्रमुख जिल्ला अधिकारी युवराज कट्टेलको निर्देशनमा सहायक प्रमुख जिल्ला अधिकारी सरोज कोइरालाको नेतृत्वमा खटिएको टोलीले छापा मार्दा करिब २० जना जुवाडे पक्राउ परेका थिए । पक्राउ परेकामध्ये केही नेपाली नागरिकले भारतीय आधार कार्ड प्रयोग गरेर क्यासिनो प्रवेश गरेको तथ्यसमेत खुलेको थियो । स्रोतका अनुसार अहिले पनि विराटनगरका केही व्यवसायी तथा युवाले भारतीय आधार कार्ड प्रयोग गरेर क्यासिनो प्रवेश गर्ने गरेका छन् । भारतीय परिचयपत्रलाई ‘सुरक्षा कवच’ बनाएर नेपाली नागरिकले खुलेआम क्यासिनो खेलिरहेको स्रोतको दाबी छ ।

क्यासिनोको लतका कारण विराटनगरका केही ठूला व्यापारिक घरानाका युवा व्यवसायी आर्थिक संकटमा परेको घटनासमेत बेला–बेलामा बाहिर आउने गरेका छन् । यस विषयमा अभिभावक तथा व्यवसायीहरूले प्रहरी प्रशासनमा पटक–पटक गुनासोसमेत गर्दै आएका छन् । यस्ता गुनासो बढेपछि गत पुसमा प्रशासनले विराटनगरका होटलहरूमा छापा मारेर नेपाली खेलाडी तथा भारतीय आधार कार्ड बरामद गरेको थियो । त्यस क्रममा होटल तथा क्यासिनो सञ्चालकलाई समेत कारबाही गरिएको थियो । तर, चार महिनामै फेरि पुरानै गतिविधि दोहोरिएको भन्दै स्थानीयवासीले प्रशासनको प्रभावकारी अनुगमनमाथि प्रश्न उठाउन थालेका छन् । हाल विराटनगरस्थित रत्ना होटलमा ‘सम्राट क्यासिनो प्रालि’ तथा होटल बिगमा ‘च्याम्पियन क्यासिनो’ सञ्चालन हुँदै आएका छन् । स्रोतका अनुसार यी क्यासिनोमा नेपाली नागरिकलाई प्रवेश गराएर खुला रूपमा जुवाखेलाउने गतिविधि भइरहेको छ ।