विराटनगर, विराटनगर भन्सार कार्यालयमा जाँचपासका क्रममा फेला परेको एउटा प्लास्टिकको बन्दुक विराटनगर भन्सारले आवश्यक कारबाहीका लागि मोरङ प्रहरीलाई बुझाएको छ । केटाकेटीका लागि खेलाउनाका रुपमा प्रयोग हुने भन्दै प्लास्टिक गन भनी भन्सार प्रज्ञापनपत्रमा उल्लेखै गरेर भन्सारमा जाँचपासका लागि आए पनि विराटनगर भन्सारले प्रहरीलाई बुझाएको हो । प्रमुख भन्सार अधिकृत उमेश श्रेष्ठले उक्त खेलाउना प्रहरीलाई जिम्मा लगाएको जानकारी दिए । मोरङ प्रहरीले पनि आफ्नो नियन्त्रणमा लिएर अनुसन्धान सुरु गरेको छ ।
भन्सारस्रोतका अनुसार यो खेलौनाको विषय सामान्य नै भए पनि खेलौनामा चेतावनीपूर्ण विवरणमा उल्लेख भएकोले प्रहरीलाई जिम्मा लगाइएको हो । उक्त खेलौना बन्दुकमा लोड भएको गोलीले लागेमा मान्छेको मृत्यु हुनसक्ने उल्लेख भएका कारणभन्सार जाँचपास नगरी मोरङ प्रहरीलाई बुझाएको कुरा बताइएको छ । त्यसपछि भन्सारमा उक्त खेलौनाको भन्सार जाँचपास कसरी गर्ने भन्ने प्रश्न सिर्जना भएको छ ।
विराटनगर भन्सारका भन्सार एजेन्ट लिलाप्रसाद नेपालको क्लियरिङ्ग एजेन्ट नम्बर ५ सय ५९ बाट मालवस्तु जाँचपास हुने अन्य सामानसहित प्लाष्टिक गनको समेत फारम भरिएको थियो । विराटनगर भन्सारका भन्सार जाँचकी प्रविन लिम्बुले प्लास्टिक गन के गर्ने भनेर भन्सार अधिकृत भीम आङदम्बे लिम्बुसँग परामर्स गरेका थिए । उक्त सामान जाँचपास गर्न मिल्छ कि मिल्दैन भनेर भन्सार कार्यालयले सुरक्षा निकायसँग राय मागेको थियो ।मोरङ प्रहरीले पनि उक्त खेलौना जस्तो देखिने प्लस्टिक गन कुन प्रयोजनका लागि भित्र्याइएको हो भन्ने अनुसन्धान थालेको जनाएको छ । नयाँ गेमिङ्ग टुल्र्स जस्तो भएको पब्जि, पेन्ट गन वा एयर गन जस्तै भएपनि त्यसमा प्लास्टिकको गोली राख्न सकिने रहेको स्रोतले बताएको छ । आयातकर्ता काठमाडौंका व्यापारी रहेका छन भने प्रहरी स्रोतले यस्तो वस्तु आयात गर्न नमिल्ने जानकारी दिएको छ ।