विराटनगर, पौष २५ — मदिरा व्यवसायी संघ मोरङको १८औँ वार्षिक उत्सव तथा संघको आफ्नै नव–निर्मित भवनको समुद्घाटन कार्यक्रम आज शुक्रबार विराटनगरमा भव्य र सभ्य वातावरणमा सम्पन्न भएको छ। लामो समयदेखि मदिरा व्यवसायीहरूको साझा आवश्यकता र चाहनाका रूपमा रहेको आफ्नै भवन निर्माण सम्पन्न भएसँगै संघले संस्थागत रूपमा अर्को महत्वपूर्ण उपलब्धि हासिल गरेको जनाएको छ।
कार्यक्रमको औपचारिक समुद्घाटन नेपाल मदिरा व्यवसायी महासंघका केन्द्रीय अध्यक्ष श्री सोनाम शेर्पा ज्यू तथा गोल्डेन ग्लोब लिकर्स प्रा.लि.का सञ्चालक श्री महेश सोनी ज्यूले संयुक्त रूपमा रिबन काटी गर्नुभएको थियो। समुद्घाटन समारोहलाई सम्बोधन गर्दै अध्यक्ष शेर्पाले मदिरा व्यवसायलाई मर्यादित, पारदर्शी र कानुनी दायराभित्र सञ्चालन गर्नु आजको आवश्यकता भएको उल्लेख गर्नुभयो। उहाँले संघको आफ्नै भवन निर्माणले व्यवसायीहरूलाई अझ संगठित, अनुशासित र सशक्त बनाउने विश्वास व्यक्त गर्नुभयो।
कार्यक्रममा नेपाल मदिरा व्यवसायी महासंघका केन्द्रीय उपाध्यक्ष श्री अंशु बन्जारा ज्यू, श्री मदन गौतम ज्यूलगायत महासंघका विभिन्न केन्द्रीय पदाधिकारीहरूले पनि आ–आफ्नो मन्तव्य राख्दै संघको १८ वर्षे यात्राको समीक्षा गर्नुभयो। उनीहरूले व्यवसायीहरूको हकहित संरक्षण, नीति–निर्माण प्रक्रियामा प्रभावकारी भूमिका र राज्यसँग सहकार्य गर्दै जिम्मेवार व्यवसाय सञ्चालन गर्नुपर्नेमा जोड दिनुभयो।
सो अवसरमा मदिरा व्यवसायी महासंघ कोशी प्रदेश प्रमुख श्री नविन तामाङ ज्यूले प्रदेशस्तरमा मदिरा व्यवसायसँग सम्बन्धित समस्या, चुनौती र सम्भावनाबारे चर्चा गर्दै मोरङ संघले अन्य जिल्लाका संघहरूका लागि उदाहरणीय कार्य गरेको बताउनुभयो। उहाँले संस्थागत भवन निर्माणले संघको दीर्घकालीन गतिविधिलाई थप मजबुत बनाउने धारणा व्यक्त गर्नुभयो।
कार्यक्रममा जिल्ला मदिरा व्यवसायी संघ इटहरी, धरान, धनकुटा, उदयपुर तथा दमकका अध्यक्षज्यूहरू तथा कार्यसमिति सदस्यहरूको पनि विशेष उपस्थिति रहेको थियो। उनीहरूले मोरङ संघको प्रगतिप्रति प्रशंसा गर्दै आपसी सहकार्य र समन्वयलाई अझ सुदृढ बनाउँदै लैजाने प्रतिबद्धता व्यक्त गरेका थिए।