सुनसरी मोरङ औद्योगिक कोरिडोरका उद्योगी मोतीलाल दुुगडको सेन्चुुरी मल बिक्री भएको एक वर्ष बितिसक्दा पनि पास हुन नसकेको पाइएको छ । ऋणमाथि ऋण थपिएर आर्थिक अवस्था कमजोर भएपछि तत्कालीन प्रधानमन्त्री केपी शर्मा ओलीको मध्यस्तामा उद्योगी दुगडले एक अर्ब ५५ करोड मूल्यमा भाटभटेनीका सञ्चालक मिनबहादुर गुरुङलाई सेन्चुरी मल बिक्री गरेका थिए । दुगडले वर्षदिन बित्नलाग्दा समेत उक्त मल भाटभटेनीका सञ्चालक गुरुङलाई पास नगरेपछि उद्योगी दुगड विवादित बन्न पुगेका छन् । देशभर रहेका आफ्नो भाटभटेनी सुपर मार्केटमा जेएनजी आन्दोलनका नाममा तोडफोड र आगजनीबाट ध्वस्त भएपछि तनावमा रहेका गुरुङले उद्योेगी दुगडलाई पटक–पटक सेन्चुरी मल नामसारी गर्न अनुरोध गर्दा पनि दुगडले नामसारी नगरेको खुलेको छ । गुरुङले उद्योगी दुगडलाई दिएको सेन्चुरी मल बिक्रीबापतको पैसाबाट उद्योगी दुगडले स्थानीय प्राइम बैंक र ग्लोबल आईएमई बैंकको ऋण तिरिसकेका छन् । अब सेन्चुरी मल कसरी मिनबहादुर गुरुङलाई पास गर्ने भन्दै उद्योगी दुगड तनावमा भएको उनी निकट व्यवसायीहरु बताउँछन् ।
स्रोतका अनुसार ग्लोबल बैंकबाहेक नै प्राइम बैंकको मात्र दुगडको नाममा रहेको सेन्चुरीयन समूहले दुई अर्ब रुपैयाँभन्दा बढी नै ऋण लिएको छ । त्यसबाहेक अन्य बैंक तथा वित्तीय संस्था र व्यक्तिको समेत गर्दा उद्योगी दुगडको विराटनगरमा ऋण मात्रै पाँच अर्ब रुपैयाँको हाराहारीमा रहेको छ । व्यक्तिगत केही ऋणसहित प्राइम र ग्लोबल आईएमई बैंकले निर्माणधीन सेन्चुरियन भवन र जग्गा कम्पनी रजिस्ट्रारको कार्यालयमा रोक्का गरेका कारण उक्त जग्गा भाटभटेनीका नाममा पास गर्नलाई उद्योगी दुगडलाई समस्या भएको हो । तर अहिले मालपोत कार्यालय विराटनगर जेएनजी आन्दोलनमा ध्वस्त भएको बहाना बनाएर उद्योगी दुगडले विभिन्न ठाउँको रोक्का सबै फुकुवा भयो भन्दै मालपोतका कर्मचारीमाथि नै व्यापक दबाब र प्रलोभन दिन थालेका छन् ।
मालपोत कार्यालय विराटनगरको कर्मचारी स्रोतका अनुसार २०८१ पछिका लिखतहरु मात्रैमा क्षति पुगेको छ । अन्य पुराना कागजातहरुमा कुनै क्षति नभएकाले उद्योगी दुगडले मागेअनुसारको काम आफूहरुबाट गर्न नसक्ने जानकारी कार्यालय प्रमुखलाई गराएको एक कर्मचारीले बताए । विराटनगरमा दुगडलाई सेन्चुरी मसलाको नामले चिनिने गरेको छ । दुगड स्पाइस एन्ड फुड प्रोडक्ट पनि उनैले सञ्चालन गर्दै आएका छन । यसबाहेक उनले विराटनगरमा ह्यारिसन होटल पनि सञ्चालन गरिरहेका छन् । अन्य तीनवटा उद्योग पनि उनकै नाममा आन्तरिक राजस्व कार्यालय विराटनगरमा दर्ता कायम रहेका छन् । जुन बक्यौता नबुझाएका कारण आन्तरिक राजस्व कार्यालयले उद्योगी दुगडको नाममा सूचना प्रकाशित गरी बक्यौता बुझाउन ताकेता पनि गरेको थियो ।
पछिल्लो समय सेन्चुरी कम्पनीको बैंकमा करिब एक अर्ब रुपैयाँ ऋण रहेको छ । पाँच करोडभन्दा बढी ऋण लिने कम्पनीको अनिवार्यरुपमा रेटिङ गराउनुपर्ने कानुनी व्यवस्था छ । उद्योगी दुगडले एक अर्बको हाराहारीमा ऋण रहँदा समेत दुगड स्पाइसेसको रेटिङ नवीकरण गरेका छैनन् । यसले गर्दा उक्त कम्पनीमा लगानी गरेका बैंकहरुको ऋण जोखिममा परेको हो कि भन्ने अवस्था आएको छ । केयर रेटिङ नेपालले दुगड स्पाइसेज एन्ड फुड प्रोडक्ट्ससँग २०२४ को जुलाई १५ मा नै इमेल र पत्रमार्फत बारम्बार आग्रह गर्दा पनि कम्पनीले सूचना उपलब्ध गराएको जनाइएको छ । केयर नेपालले दुगड स्पाइसेसलाई असहयोग गर्नेको सूचीमा राखेको छ ।