झापा , उद्योगी तथा व्यवसायीहरूका लागि मंगलबार झापाको विर्तामोडमा स्टार्टअप तथा नवप्रवर्तन सम्बन्धी अभिमुखीकरण कार्यक्रम सम्पन्न भएको छ।उद्योग–व्यवसाय क्षेत्रमा सफलता हासिल गर्ने उपाय, नवप्रवर्तनलाई अंगिकार गर्ने तरिका र सिर्जनात्मक उद्यम विकास गर्ने विषयमा केन्द्रित कार्यक्रम नेपाल उद्योग वाणिज्य महासंघ कोशी प्रदेशले आयोजना गरेको हो। कार्यक्रम स्विस सरकारको स्विस विकास सहयोगअन्तर्गत सञ्चालित सहज परियोजनाको नेपाल कृषि बजार विकास कार्यक्रम को प्राविधिक सहयोगमा भएको हो।

कार्यक्रममा स्टार्टअप तथा नवप्रवर्तन विषयक विज्ञ निरज खनाल र अनिल पराजुलीले सहजीकरण गरे। नेपाल उद्योग वाणिज्य महासंघ कोशी प्रदेशका कार्यक्रम संयोजक सञ्जीव पौडेलले सञ्चालन गरेका कार्यक्रमको औचित्यबारे महासंघका कार्यकारी निर्देशक राधारमण भण्डारी ‘श्यामझ’ ले प्रकाश पारे। कार्यक्रममा झापा र इलामका उद्योग वाणिज्य संघका अध्यक्ष तथा कार्यालय सचिव, स्थानीय तहका प्रमुख प्रशासकीय अधिकृत, उद्यम विकास कार्यक्रम र कृषि विकास शाखाका प्रतिनिधिहरूको समेत सहभागिता रहेको थियो।