बिरामीलाई उपचारमा छुट दिने विषयमा विराटनगरका दुई ठुला स्वास्थ्य संस्था न्यूरो कार्डियो एण्ड मल्टिस्पेशियालिटी हस्पिटल र नोबेल मेडिकल कलेज टिचिङ्ग अस्पताल बिच सम्झौता भएको छ । न्यूरो अस्पतालका अध्यक्ष डा. विरेन्द्रकुमार बिष्ट र नोबेल मेडिकल कलेजका संरक्षक डा. सुनिल शर्माको उपस्थितिमा आइतबार बिरामीलाई सहुलियतमा उपचार सेवा प्रदान गर्ने सम्झौता पत्रमा हस्ताक्षर भएको हो ।सम्झौता अनुसार न्यूरो अस्पतालले नोबेल अस्पतालमा पठाउने क्यान्सर रोगका बिरामीले उपचारमा २५ प्रतिशतसम्म छुट पाउने छ । जसका लागि न्यूरो अस्पतालले आफ्नो लेटर प्याडमा बिरामीको नाम उल्लेख गरेर पठाउनु पर्नेछ ।यस बाहेक न्यूरो अस्पतालको सिफारिसमा नोबेल अस्पतालले १ वर्षमा १० देखि १५ जना बिरामीलाई किड्नी ट्रान्सफरमा ५० प्रतिशतसम्म छुट दिने सम्झौता पत्रमा हस्ताक्षर भएको छ । डा. सुनिल शर्माले विराटनगरको नोबेल मेडिकल कलेज र काठमाडौँमा काठमाडौँ मेडिकल कलेज सञ्चालन गरिरहेका छन् ।विराटनगरको नोबेल मेडिकल कलेजमा केही समय भित्र किड्नी ट्रान्सफरको उपचार सेवा सुरु हुन लागेको छ । काठमाडौँ मेडिकल कलेजमा किड्नी ट्रान्सफर सेवा उपलब्ध छ ।नोबेल कलेजका संरक्षक डा. सुनिल शर्माले विराटनगरको नोबेल मेडिकल कलेज र काठमाडौँको काठमाडौँ मेडिकल कलेजमा किड्नी ट्रान्सफर गर्न न्यूरो अस्पतालको सिफारिसमा उपचार सेवा लिन आउँने बिरामीलाई ५० प्रतिशतसम्म छुट दिने गरेको सम्झौता पत्रलाई कार्यान्वयन गर्ने बताए ।न्यूरो र नोबेल मेडिकल कलेजमा कार्यरत चिकित्सक, स्वास्थ्यकर्मी, नर्सिङ स्टाफ तथा अन्य कर्मचारीका लागि सीप विकास तालिम सञ्चालन गर्ने सम्झौता पत्रमा हस्ताक्षर भएको छ । विराटनगरको न्यूरो अस्पतालमा उपचार सेवा लिन आउने भारतीय बिरामीको संख्या अत्याधिक हुने गरेको छ । भारतीय बिरामीलाई थप उपचार सेवा प्रदान गर्ने उद्देश्यका साथ न्यूरो र नोबेल अस्पताल बिच सम्झौता पत्रमा हस्ताक्षर भएको हो । तर भारतीय बिरामीले न्यूरो अस्पतालमा उपचार सेवा लिन जाँदा मोटो रकम छुट पाउँने छन् ।