आन्तरिक राजस्व विभागले पूर्ण कर परिक्षण गर्न सबै कार्यालयलाई पत्राचार गरेको छ । पत्रचारसँगै अब राजस्व छली गर्ने फर्ममाथि अनुसन्धान गर्ने बाटो खुलेको हो ।
आन्तरिक राजस्व कार्यालय विराटनगरमा दर्ता गरी कारोवार गर्दै आएका व्यवसायिक फर्महरूको पुस मसान्तमा आर्थिक वर्ष २०८२/८३ का लागि पूर्ण कर परिक्षणलाई निरन्तरता दिने वा नदिने भन्ने अन्यौल रहेको थियो । हालै विभागले पत्राचार गरेसँगै कर परिक्षणको कामले निरन्तरता पाउने निश्चित भएको हो । गत भदौ २३ र २४ गते भएको जेन–जी आन्दोलनपछि कोशी प्रदेशको राजधानीको मुख्य विराटनगर बजारमा नै कहालिलाग्दो रूपमा बढेको कर छलीका घट्नाले विशेष चर्चा पाउन थालेको छ । अव पूर्ण कर परिक्षण र राजस्व छलीका कुरामा आन्तरिक राजस्व कार्यालय आक्रमक हुने अवस्था बन्ने अपेक्षा गरिएको छ । जेन–जी आन्दोलनबाट ध्वस्त भएको आराकाबाट सामान्य सेवा मात्रै दिने र कुनै व्यवसायी प्रतिष्ठानमा अनुगमन नै गर्न नसक्ने भन्दै विराटनगर बजारमा अकल्पनी राजस्व छलीका घट्नाहरू सार्वजनिक भएका थिए ।
आन्तरिक राजस्व कार्यालयले पनि कर्मचारीमा काम गर्ने मनोबल नभएको भनेर पछिल्लो समय बजार अनुगमन समेत कार्यालयले गर्न सकेको थिएन । सोही कारण व्यवसायीबाट भएका कर छलीका उजुरीको चाङ्ग लागेर कार्यालयमा थन्किएर बस्दासमेत आराका मौन भएर बसेको थियो । तर, गत मंसीर १७ गते आन्तरिक राजस्व विभागका निर्देशक वासुदेव अधिकारी सबै मातहतका कार्यालयहरूलाई पत्राचार गरेर पूर्ण कर परिक्षण समयमा सम्पन्न गर्न निर्देशन दिएका छन् । अब विस्तारै आराकाका कर्मचारी बजारमा गएर अनुगमन गर्ने र राजस्व छलीमा संलग्नलाई आवश्यक कारबाही प्रक्रिया अगाडी बढाउने तयारी गरेको आराका उच्चस्रोतले बताएको छ ।
जेन–जी आन्दोलन पश्चात् बजार अनुगमन नहुँदा विराटनगर बजारमा अनियन्त्रित रूपमा राजस्व छली बढेको जानकारी पनि व्यवसायी स्रोतले नै आर्थिक दैनिकलाई दिएको छ । राज्यका निकायहरू नीरिहुँदा अराजक र अनियन्त्रीत बजार भएको थियो । अर्थ मन्त्रालयले नै सबै उद्योगी व्यवसायीलाई आफैं (स्वयं) कर निर्धारण गर्न र सरकारलाई राजस्व बुझाउन पछिल्लो समय आह्वान नै गरेको थियो । अहिले आएर सबै प्रकारका कर परिक्षण रोक्न भन्दै निर्देशन गरेपछि सरकारले लिएको नीति अनुसारको स्वयं कर निर्धारण लक्ष्य नै धरापमा परेको दाबी स्रोतले गरेको हो ।