विराटनगर । नेपाल र इजरायलबीचको द्विपक्षीय व्यापार विस्तार, दुवै देशका निजी क्षेत्रबीच आपसी सहकार्य, प्रविधि हस्तान्तरणलगायत व्यावसायिक सम्भावनाका सम्बन्धमा इजरायली राजदूत श्मुलिक एरिकवास र उद्योग संगठनबीचमा छलफल भएको छ ।छलफलमा संगठनका अध्यक्ष नन्दकिशोर राठीले दुई देशबीचको व्यापार तथा औद्योगिक क्षेत्रहरूमा आपसी सहकार्यको माध्यमबाट नयाँ सम्भावनालाई पहिल्याउन आवश्यक रहेको बताएका थिए । उनले एकअर्काका परस्पर क्षमताहरू पहिचान गरी व्यावसायिक साझेदारीका सम्भावनाहरू खोज्न सकेमा नेपाली र इजरायली उद्यमीका बीचमा लगानी तथा संयुक्त उद्यमको अनुकूल वातावरण तयार गर्न सकिने उल्लेख गरे । अध्यक्ष राठीले इजरायलले प्रविधि, नवप्रवर्तन र आधुनिक कृषि अभ्यासका क्षेत्रमा उल्लेख्य प्रगति गरेको भन्दै नेपाल पनि कृषिप्रधान देश भएकाले हरितगृह प्रविधिको बाली व्यवस्थापन गर्न सक्ने जानकारी दिए । राठीले प्रशोधनका क्षेत्रमा इजरायलबाट लाभ लिन सक्नुपर्ने धारणा राख्दै त्यसका लागि ज्ञान आदानप्रदान, तालिम कार्यक्रम र कृषि उद्योगमा लगानीका माध्यमबाट सहकार्य गर्नुपर्नेमा जोड दिए ।

दुवै देश बीचका निजी क्षेत्रको सहकार्यले औद्योगिक विकासको नयाँद्वार खोली दीर्घकालीन साझेदारीको आधार निर्माण गर्ने भन्दै निजी क्षेत्रबीचको आपसी सहकार्यलाई प्रगाढ बनाई आर्थिक एवं औद्योगिक सम्बन्ध सुदृढ पार्ने दिशामा सहयोग गर्न राजदूतलाई अनुरोध समेत गरेका थिए । उक्त छलफल कार्यक्रममा इजरायली राजदूत स्मुलिक एरिक वासले पनि व्यापार र व्यवसाय केवल आर्थिक वृद्धिको माध्यम मात्र नभई सामाजिक रुपान्तरणका लागि पनि एक महत्वपूर्ण आधार भएको बताएका थिए । उनले नेपाल र इजरायलबीचको दीर्घकालीन सौहार्दपूर्ण सम्बन्धलाई अझ मजबुत पार्ने उद्देश्यले व्यापारिक सम्बन्ध विस्तारका लागि आफूले नेपाल बसुन्जेल सक्दो पहल गर्ने प्रतिबद्धता जनाए ।

राजदूत स्मुलिक एरिक बासले नेपालको आर्थिक तथा उत्पादन क्षमताबारे इजरायल थप जान्न इच्छुक रहेको भन्दै नेपालबाट आयात गर्न सकिने सम्भावित वस्तुहरूका सम्बन्धमा अझै अध्ययन गर्न आवश्यक रहेको बताए । राजदूत वासले दुवै देशका सम्बन्धित निकायहरूको सहकार्यमा यस विषयलाई अघि बढाउन सकिने र यसले नेपालका उद्योग व्यवसाय क्षेत्रलाई अन्तर्राष्ट्रिय बजारसम्म पहुँच पुर्याउने अवसर प्रदान गर्ने कुरा बताए । उनले दुवै देशका निजी क्षेत्रबीचको सहकार्यलाई अझ सुदृढ बनाउन आफूले आवश्यक सहजीकरण गर्ने बताए ।यस्ता साझेदारीले दीर्घकालीन लगानी, सीप आदानप्रदान, रोजगारी सिर्जना र दुवै देशको पारस्परिक हितमा टेवा पुर्याउने विश्वास राजदूत वासले व्यक्त गरेका थिए ।