विराटनगर । भारतीय वाणिज्य विभागको एक विज्ञ टोलीले मोरङमा रहेका चार पाम उद्योगहरुको अनुगमन गरेर फर्केको छ । यहाँ उत्पादित पाम तेलको नमुना समेत संकलन गरेर लगेको एक उद्योगीले जानकारी दिए ।
स्रोतका अनुुसार नेपाली पाम उद्योगीले भारतीय ब्रान्डको नाम राखेर निकासी गरेको फेला पारेपछि विभागको टोली अध्ययनको लागि नेपाल आएको हो । केही समय अगाडिदेखि भारत सरकारले खाने तेलको कच्चा पदार्थको महसुलमा ५० प्रतिशतले कटौती गरेको छ । भारतले त्यहाँका तेल उद्योगीको मागलाई सम्बोधन गर्दै कच्चा पदार्थको महसुल कटौती गरेपछि नेपाली तेल उद्योगीहरु स्तब्ध भएका थिए ।
यसरी कच्चा तेलको महसुलमा भारत सरकारले कटौती गरेसँगै भटमास, सूर्यमुखी र पामको कच्चा तेलको आयातमा लाग्दै आएको २० प्रतिशत आयात महसुललाई पनि आधा घटाइदिएको थियो । कच्चा खानेतलमा भारतले सामाजिक सुरक्षादेखि केही साना कर पनि कटौती गरेको छ । भारतका तेल उद्योगीले इन्डोनेसिया, मलेसिया, युक्रेन, अस्ट्रेलियालगायतका मुलुकबाट आयात गर्ने तीन प्रकारकै कच्चा तेलमा १० प्रतिशत मात्र महसुल तिर्ने व्यवस्था गरेपछि नेपाली पाम उद्योगी संकटमा परेका छन् ।
सुनसरी मोरङ औद्योगिक कोरिडोरका एक उद्योगीका अनुसार भारत सरकारको महसुल घटाउने निर्णयपछि नेपालको एक खर्बभन्दा बढीको निर्यात व्यापार नराम्रो गरी प्रभावित हुने भएको छ । उनले अब निर्यातको उद्देश्यले कुनै उद्योगीले पनि कच्चा तेलको एलसी नखोल्ने र भएको तेल क्लियर गर्नतिर मात्रै लाग्ने अवस्था आएको जानकारी दिए । भारतका उद्योगले आफैँ ११ प्रतिशतको सहुलियत पाएपछि यहाँको निर्यात नराम्ररी प्रभावित हुनेछ । नेपालबाट गत आर्थिक वर्षमा ८९ अर्बको खाने तेल भारत निर्यात भएकोमध्ये ७८ अर्बको भटमासको तेल, १० अर्बको सूर्यमुखीको तेल र बाँकी पाम तेलको हिस्सा रहेको थियो । यसरी नेपालले निकासी गर्दै आएको पाम तेलमा भारत बढी कठोर बन्नुमा नेपाली उद्योगीहरुबाट भएको बदमासी मानिन्छ ।
नेपाली पाम उद्योगीले भारतीय ब्रान्डमा पाम तेल उत्पादन गरी फेरि भारतमा निकासी गरेको फेला पारेपछि भारत बढी आक्रामक भएको हो । त्यसैको परिणाम केही दिन अगाडि भारती दूतावास र नेपालको बाणिज्य मन्त्रालयको सहजीकरणमा भारतीय वाणिज्य विभागको टोली मोरङ सुनसरीका पाम उद्योगको अनुगमन गरी पाम उत्पादनको नमुना समेत संकलन गरी लिएर फर्किएको समाचारस्रोतको दाबी छ ।